每当提起江南，眼门前就蕴起一道烟水，迷迷蒙蒙，慢慢叫行来一只小船，穿过弗高个石洞门，荡进烟雾里。

小桥流水，烟水迷离，确实，江南搭水总归相依相伴个。

江南地区河道纵横，水网密布，而倚水而居个江南人也就因水结缘哉，住个是临水居，行个是水上船，唱个是水磨腔，吃个是水中仙。

藕，茭白，菱，鸡头米，荸荠，慈姑，莼菜，水芹，该个八只水生植物，味道清鲜，色泽清丽，如仙人之姿，拨挑剔个江南人奉为水中八仙，贯穿四季食单。

所谓“春季荸荠夏时藕，秋末茨菇冬芹菜，三到十月茭白鲜，水生四季有蔬菜。”讲个就是该八样食鲜。

春 有莼菜 

莼菜是国家一级保护植物当中惟一个常用食材。宋朝辰光，就搭花石纲，丝绸绫罗同属贡品。

而早勒海西晋年间，就有吴中名士张季鹰因思念莼菜鲈鱼美而弃官归乡个轶事。后世诗人经常提起个“莼鲈之思”就源出于此。

莼菜本身无不味道，叶爿浪有一层赛过琼脂个黏液，大多用来汆汤。落汤以后个口感鲜滑，如鱼髓蟹脂，赛过丝绸滑过斛咙，难用言语描摹。

 秋  品茭白

茭白古称菰菜，是引得张翰辞官个另外一只时鲜。

苏州人一年四季弗断茭，但不过最好个茭白还是勒海早秋时节。相传苏州城东个葑门就因茭白而得名，可见吴人对茭白个执着。

茭白吃口甘洁，清而有韵，实勒吃法多样，可荤可素，大多切丝削片，入火慢烧。

苏帮菜里有油闷茭白、虾籽茭白等经典菜式，民间也有茭白炒蛋、茭白炒毛豆子、茭白烧肉等简斋吃法。

新秋  有菱角

秋来鲜品当属菱，根据外形弗同，还可以分出和尚菱、馄饨菱、刺菱等等，当中的佼佼者就是红菱哉。

红菱大多春栽秋收，吴歌里就有唱着：“桃花红来杨柳青，清水塘里栽红菱。姐栽红菱郎栽藕，红菱牵到藕丝根。”

红菱颜色显，讨人欢喜，名字也好听。生得早个是水红菱，稍微晏点大一廓个叫雁来红，青亨亨个叫莺哥青。

鲜鲜个红菱可以当水果生吃，味道爽脆甘洁，水拖拖，甜津津，瀴冻冻，舌尖像煞能摸着水个灵魂。

 新秋  有塘藕

新秋里菱个最佳搭档就是藕哉，白藕红菱镶碧荷，来得个好看。

苏州个塘藕勒海唐朝辰光，就已经是贡品哉。藕大多有七孔，赛过七窍玲珑心，而苏州个塘藕为人称奇个是有九窍，食而无滓。若是单节九窍，就更是佳中上品哉。

鲜藕切片好当水果吃，放勒小碟子里，用牙签细细叫挑仔吃，赛过冰盘雪藕，能得藕之真味。

也可以切丝清炒，或者刨细和肉，做藕圆。苏州人还欢喜拿糯米塞勒藕孔里，加糖蒸熟，称焐熟藕，也就是现在弗少人讲个“糖藕”。

 中秋  鸡头米

鸡头米学名芡实，因结实形似鸡头而得名。芡实性暖，可以入药，有益精气、利耳目、止烦渴、除虚热等功效，是一味名贵个食材。

苏州南塘鸡头米是南芡里个佳品，鸡头滴圆光滑，弗像“北芡”浑身有刺，拨开来个米粒也晶莹玉白，吃口软韧。

每年农历八月半，鸡头米正当时，苏州人个传统吃法也相当个清爽，清水加糖桂花就好。

范烟桥赞俚：“银殴浮玉、碧浪沉珠，微度清香，雅有甜味，固天堂间绝妙食品也。”

 腊月  掘荸荠

腊月里，吃荸荠。

荸荠，因形似真人个肚皮眼而得名，也有写作“荸脐”个。苏州是全国四大荸荠产地之一，特别是苏州城东车坊镇个荸荠，形大而色黑，清朝末年北京城里还有“天津鸭儿梨不敌苏州大荸荠”个说法。

荸荠生吃，味道清冽甘甜，清热生津。但不过荸荠好吃皮难削，实勒，老法头还专门有人做“扦光荸荠”个生意。

荸荠也能烧熟仔吃，苏州人吃年夜饭个辰光还会得拿熟荸荠镶勒饭里，称元宝饭，啥人掘着元宝，开年就会得福财两旺。

 越冬  尝水芹

水芹，亦叫水英，勒海古人眼睛门里还是文雅个象征，《诗经》就有“思乐泮水，薄采其芹”个说法，后世弗少人就称读书人为“采芹人”。

北方种个大都数是旱芹，而伲江南地区个水芹一般只有叶爿显绿，杆杆头细圆中空，黄白颜色，称“白头”，“白头”亦长，品质亦好。

水芹嫩头要到深秋再采，一脚好吃到开春，是“堵冬缺”个品种。

水芹个味道鲜嫩，爆炒以后有一种独特个清香，吃法有二：一炒、两拌。可以切香豆腐干、肉丝翻炒，也可以加麻油冷拌，清鲜爽口。

 冬春  见慈姑

慈姑，一岁根生十二子，如慈姑之乳众子，故名。慈姑开花雪白，赛过玉蝶翩飞，老法头有弗少歌咏慈姑花个佳句。

苏州种植慈姑的历史相当个长，有一种改良品种叫“苏州黄”，皮黄肉白，吃口香糯细腻，外加入口苦味少而淡，涩味轻，但不过烧个辰光还是要先去涩。

苏州人吃慈姑大多搭荤菜，譬方说慈姑烧肉、慈姑炒鸡片、慈姑烧蹄髈汤等等。

另外还有一种小吃“慈姑片”，拿慈姑切成薄片放勒油里氽，氽好个慈姑片搭薯片差仿弗多，吃口爽脆，是每一个苏州小囡个童年零食记忆。

水里八仙，味出八鲜，该个是水拨江南个馈赠，也是江南清淡饮食个根基。

文 | 予安

版 | 予安

图片参考《植物名实图考》