游记 | 塞尔维亚之旅·壹 风雨里走来贝尔格莱德
愿贝尔格莱德 不再有硝烟
头一埭晓得该个国家是因为06年个世界杯，搿辰光还叫塞黑，全称塞尔维亚和黑山国家联盟。
看过该届世界杯个朋友作兴还有点印象，塞黑队勒海预选赛个辰光踢得来得个狠，压仔西班牙一头晋级决赛圈。
朆壳张，就勒海开赛前头个无不几日天，全民公投国家分裂，队伍里人心涣散，最后小组赛三战全败出局。（因为预算赛时以塞黑队的名义晋级，决赛圈时也需以同样身份参赛，世界杯后分裂为两个足球队）
06德国世界杯小组赛 塞黑0-6惨负阿根廷
再后来我再晓得，该个多灾多难个国家已经弗是头一埭分裂哉，塞黑以前，俚叫南斯拉夫联盟共和国，也就是伲一代人非常熟悉个“南联盟”或者“南斯拉夫”。
伲飞机落地个头一站就是曾经个南斯拉夫首都——贝尔格莱德，一个从硝烟里走出来无不几化辰光个城市。
硝烟印记的建筑物 贝尔格莱德 Belgrade
八个月底个贝尔格莱德，热显已经弗重哉，除脱中昼心里还有点热吼吼，早晏侪是凉风习习。
搭弗少朋友个行程弗一样，伲头一个落脚点弗是市中心，而是贝尔格莱德城郊个一个小镇——泽蒙。
俯瞰多瑙河畔 泽蒙 Zemun
泽蒙是河流上游个一个风景秀丽个小镇，沿仔山路步道走到顶就能看见一个红颜色个砖塔——戛尔朵什塔。
打卡必去 戛尔朵什塔 Gardos Tower
该个是所有来泽蒙个人侪要打卡个地方，登到塔顶就能看得见整个小镇个全景。
俯瞰多瑙河和泽蒙 Zemun
塔浪下来，沿仔路望前头走，就能走到河边浪。河堤边浪侪是散步个居民，三三两两个，日脚过得悠笃笃。连带仔河里个天鹅也是慢腾腾个，一群一群个沿仔河岸游来游去。
该个就是多瑙河个垂夜快。
自由的天鹅
伲勒海河边浪寻仔个风景绝佳个位置坐下来吃夜饭，满满一大盆烤羊排只要300块，吃得伲两家头顶勒顶。
Toro Grill 牛排馆 烤羊排
日里个泽蒙还是蛮闹猛个，特别是通到教堂个一路浪，有沿街卖艺个居民，闹猛个集市，还有便宜个冰淇淋球。
泽蒙到贝尔格莱德市中心只有八公里，乘个公交车就到哉，沿仔多瑙河一路往下，还会得路过中国驻南斯拉夫大使馆遗址。
泽蒙坐84/15路至Yuhoslavia Hotel下车 日本大使馆旁
我们去的时候还是一个金属纪念牌
空袭过去仔毛毛叫廿年哉，战争个痕迹已经消失，只留下来一块烈士纪念牌，背后头是一只工地，新建个项目是中国文化中心大厦。
在建的中国文化中心大厦
搿日搭太阳蛮旺，伲勒纪念牌门前静静叫立仔长远，苦痛个记忆已经淡哉，但不过总归还是有人记得个。
花常新，人常往。
俚离开个辰光，有一家门也寻仔过来，爷娘带仔一个还抱勒手里个小囡。擦肩而过个辰光，听见年轻个母亲勒海讲：99年中国大使馆……
19年又在原地立了一块石雕纪念碑
伲住勒贝尔格莱德市中心个共和国广场附近，住宿条件远比预料个要好，价钿倒也弗算贵。
市中心的特使酒店 Envoy Hotel
酒店送的巧克力
酒店背后头就是闹猛个商业街，喷泉、建筑、拉提琴个小娘儿，一片繁华个景象。
售画人 米哈伊洛大公街 Knez Mihajlova
街头演奏的姑娘 米哈伊洛大公街 Knez Mihajlova
斯卡达利亚步行街 Skadarska Ulica
餐厅都集中在这里 一年四季花团锦簇
作兴因为中塞关系密切，街浪向个指示牌侪有中文标识，姆妈再也弗怕我走弗见脱哉。
神奇的中文路牌
中浪慕名跑到两只小鹿去吃肋眼牛排，对伲来讲分量真个是搨搨潽。
肋眼牛排 两只小鹿餐馆 Two Deer
松露牛排 Casa Nova餐馆
意大利面 Casa Nova餐馆
吃好仔伲就登勒街浪瞎晃，贝尔格莱格个街浪到处侪是咖啡馆，走两步就能歇一歇。塞尔维亚人有一个Kafana文化，弗管啥个辰光，咖啡馆、酒吧侪坐满仔人。
12块钱的摩卡
没能成行的圣萨瓦大教堂 Sava Temple
气势恢宏的圣马克教堂 Saint Mark
教堂内部圣母像
教堂外书市的小朋友
风雨已经远哉，但不过街头个建筑还是留下仔枯焦个印记搭仔社会主义个回忆。
北约空袭遗址
铁托时期的社会主义标语
垂夜快个辰光，伲荡到仔卡莱梅格丹城堡。
卡莱梅格丹城堡 Kalemegdan
贝尔格莱德是一个弗太平个城市，俚勒海萨瓦河搭仔多瑙河个交汇处，拨称作“巴尔干个大门”，因为地理位置重要，历来是兵家必争之地。
萨瓦河与多瑙河交汇处
曾先后成为罗马帝国、拜占庭、保加利亚、匈牙利、奥斯曼帝国个争夺地，据记载贝尔格莱德历史浪有44趟拨夷为平地，从公元三世纪以来，几乎每一代人侪经历过战争。
装扮成中世纪士兵的工作人员
认真摆pose的工作人员
实勒，搭别个城市个风花雪月弗同，勒塞尔维亚，最多个历史建筑就是城堡要塞。
卡莱梅格丹城堡就是中世纪建成个一只重要个军事堡垒，俚立勒萨瓦河搭仔多瑙河个交汇处，见证仔117趟战争。
城墙边有军事博物馆
博物馆展出的装备
博物馆展出的武器
登临城堡个最高处，正好能望得见萨瓦河搭仔多瑙河，伲坐勒巨大个城墙浪吹仔夜风，等夕阳西下。
转去个辰光，伲碰着一个勒海学中文个热情个披萨小哥。勒俚个盛情邀请之下，伲买仔一块披萨、几只面包，当第二日天个早饭。
热情的披萨小哥
手持式披萨 一路托着回酒店
夜深则，街浪个人慢慢叫散脱则，城市也困着哉。
再会
贝尔格莱德
文 | 予安
版 | 予安
部分图片来自网络
往期导读