游记 | 在古巴结识Mojito的日子,那个加勒比的夏天
麻烦给我的爱人来一杯Mojito
我喜欢阅读她微醺时的眼眸
弗晓得,倷对古巴个最初印象是啥个,是雪茄?老爷车?切?还是周杰伦个新歌Mojito?
周董的《mojito》
我对古巴最初个印象是勒高中地理课浪,老师讲着三峡大坝,说起98年水氽:“搿辰光,伲困难,社会主义兄弟个日脚也弗好过,但不过还是能帮就帮个。譬方说古巴,俚笃就捐仔几十万斤糖拨伲。”
几十万斤糖
就是我对古巴最初个印象,也是古巴拨世界最初个印象。
曾经的“古巴糖“
故事有点远,要从地理大发现讲起。
1492年,哥伦布越过大西洋发现仔新大陆,登上仔古巴岛。勒俚第二次登岛个辰光,拿加那利群岛浪个甘蔗根茎也带仔过去。
古巴岛对制糖甘蔗来讲,是弗能再好个生长环境哉。实勒,搿点甘蔗赛过老虫特勒米缸里,无不几化辰光就长成功仔一大片一大片个甘蔗林。而蔗糖工业,也就成为仔古巴个支柱产业之一。
古巴种植园收割甘蔗
甘蔗榨糖以后会得挺下来一种黑黜黜,有焦糖味道个液体——糖蜜。最早个种植园奴隶就用糖蜜蒸馏,做出来仔一种蔗糖酒Tafia。后首来慢慢叫改良,就形成功仔现在家喻户晓个烈酒——朗姆酒 (El Ron)。
而朗姆也就是蛮多鸡尾酒个主要成分之一,譬方说Mojito。
朗姆酒有一个别称,叫“海盗之酒”。历史浪个加勒比海勒十六十七世纪是海盗个乐园。俚笃发现朗姆酒赛过万金油,亦好吃,亦好驱寒,亦好壮胆,还能当麻药。实勒,后首来该只酒变成功仔海盗之间个硬通货。
海盗之酒 朗姆酒
但不过搿歇辰光个海盗有一个天敌,弗是海也弗是军队,而是败血症。因为长期漂勒海浪向,吃弗着鲜鲜个素小菜,弗少海员就因为缺少维生素C而生仔败血症。
后首来有人发现吃橙子、柠檬可以缓解,甚超至于治疗败血症,该诸酸性水果也就便成为仔出海个标配。
讲是有一日,臭名昭著个海盗头头德雷克着生头里要想“享受生活”,就拿柠檬、朗姆酒、苏打水搭仔薄荷镶勒仔一淘。尝仔一尝,味道倒来得个好,世界浪个头一杯Mojito就实梗诞生哉。
朗姆酒的配方
因为古巴原来是西班牙个殖民地,当地人也侪讲西班牙语,实勒,Mojito弗叫莫吉托,而是Mojito。
我头一埭吃着该口酒,是勒古巴个毕业典礼浪。
玻璃杯里镶两片柠檬,一根碧绿生青个薄荷叶勒里向跳舞,来得个好看。勒国家宴会厅个门口,老师拨伲一人发仔一杯。我当仔是啥个好吃个饮料,呼仔一大口,辣豁豁个味道从嘴里直冲头顶心,险险叫整个人烧起来。
长得很有欺骗性的Mojito
从此以后嘦得碰着Mojito侪要加一句sin alcohol(不要酒精)。
除脱Mojito,另外有一只鸡尾酒也是酒吧里个常客,也是古巴血统,叫作Cuba Libre(自由古巴)。
假使讲Mojito是西班牙殖民故事个开始,搿末,Cuba Libre就标志仔西班牙殖民历史个终结。
20世纪初,古巴掀起仔独立战争个浪潮,为仔反抗西班牙个殖民统治,古巴人民就提出仔“Cuba Libre”(自由古巴)个口号。而勒该个过程当中诞生个鸡尾酒也就有仔一个充满革命调性名字。
Cuba Libre
其实骨仔,因为镶仔可乐勒,该只酒个味道倒弗是捺亨冲个。比起Mojito,更加适合勒海海滩浪听歌,跳舞,养老。
我接触Cuba Libre,倒弗是因为古巴搿段历史,而是因为伲学西班牙语个辰光,有一课个听力材料写个就是Cuba Libre个做法。
可见古巴个朗姆酒文化已经深入骨髓哉。
1. 放冰块
2. 倒朗姆酒
3. 加柠檬汁搭仔切片柠檬
4. 倒肥宅快乐水
5. 搅拌均匀
Viva Cuba
听听《Mojito》,回想加勒比风情,一带弗带12年哉,有空我再来拿古巴个故事讲拨唔听。
文章 | 予安
图片来自网络
往期导读
再见亚平宁 | 凋零郁金香