2019年到了，总觉得新的一年里应该有点新内容，想了又想，还是做成访谈形式吧，让大家听一听不同人口中的吴语故事！

吴人云  |  19年第03期  |  Hiro孫悟空

我们能为方言做些什么？

这个命题很大又很小，也许你说只能从自己做起多说多讲，也许有人说我要创作一本方言作品出版普及。

今天我们一起来看看，孙悟空和苏州话歌曲的故事。

予安：大家好，今朝呢伲请着个是孙悟空，乃末首先喊俚自家介绍一下吧。

孙悟空：大家好，我是孙悟空，相信有非常多个朋友已经听过我唱歌则，希望唔笃会得欢喜，谢谢。

予安：哦，乃末今朝伲请着孙悟空呢，就是来讲讲俚勒写该个苏州闲话歌曲个事体。乃末首先头一个问题，晓得倷老早点是学评弹个，搿末倷啥辰光开始唱流行歌曲个呐？

孙悟空：我勒海读小学辰光就非常欢喜唱流行歌曲，搿歇辰光听周杰伦，也非常欢喜周杰伦，就开始学仔唱哉。

予安：哦，赛过朆学评弹个辰光就已经开始学唱流行歌曲哉，阿是啊？

孙悟空：是个，从小就非常欢喜。

予安：后首来，倷开始用苏州闲话唱歌，该个是从啥辰光开始个呐？阿有啥个原因该场仔驱动仔倷来唱苏州闲话个歌曲呢？

孙悟空：呃，大概是2014年左右，搿歇辰光就是，其实也是溜孛相吧，因为学评弹嘛，我觉着歌可能也可以用苏州闲话去唱，一开始唱个侪是网络歌曲，溜孛相。

过后再开始觉着苏州闲话哀个音调呢，也比较适合点比较慢个，有种流行歌曲，比较优美个，有中国风格个，乃末慢慢叫唱唱，觉着也蛮好。

予安：嗯，现在唱仔弗少歌哉，搿末倷觉着倷搿点歌里向，最最有影响力个是哪一只呢？

孙悟空：最有影响力末我觉着就是搿只《姑苏小食客》啘！因为倷到临顿路地铁出来，边浪有爿糖粥店还一径勒放唻。

予安：哈哈，对，搿只歌是老里八早就有哉，外加一径听人家勒海电视台啊，广播台啊，唱勒啥个。乃末倷最欢喜个是哪只呢？阿是该只《姑苏小食客》呢，还是别个啥个？

孙悟空：呃，我最欢喜个是头一只写个歌，就是搿只《外婆桥》，我非常欢喜。

孙悟空：虽然搿只歌创作，现在听听啊，还是比较简单个，包括曲调啊啥物事，但是搿个歌词搿歇辰光就是一口气写出来个。现在看看也是我个人非常欢喜，比较有感情。

予安：嗯，外加也是搭唔笃外婆自家有关系个嘛，所说弗一样个。

孙悟空：欸，是个。

予安：搿末倷勒海写该点歌个辰光曾阿碰着过啥个困难，觉着最大个困难是啥个？

孙悟空：呃，最大个困难是无不辰光，因为毕竟哀个是作为一个爱好，自家末总归也要有自家个工作，养活自家个工作，所以也是无不辰光。

孙悟空：乃末因为倷讲钞票方面呐，收入方面我觉着是另外个，首先倷要先有辰光，再可以去做。因为有辰光，倷铜钿少脱点，也可以去拿俚做好。主要还是一个辰光吧，还有就是精力，为工作要付出一定个精力，还有工作压力嘛，所以哀个上头就侪欠缺点哉。

予安：嗯，主要还是精力问题阿是啊，毕竟弗是专业做该个事体个。倷要自家抽空出来做该个，乃末还要想拿俚做得好点，该个要化脱个辰光是相当长个。

孙悟空：对个，要非常多个功夫个。

予安：对，搿末倷今年阿有别个啥个创作计划勒呐？

孙悟空：嗯，今年有几个寻着我个，大概两三个吧，哀个现在勒海创作当中，当然自家也有点想法，具体个呢，讲得多呢，也无啥能讲得多个，就到辰光出来大家听作品吧！

予安：我晓得有一只歌《竹枝词》勒海唱则，阿是啊？

孙悟空：呃，对个对个，搿只我刚刚忙脱，哀日可以录哉。

予安：该只歌应该春天头可以听得见哉。

孙悟空：对对对，勒海三月中之前吧，拿俚录出来。

予安：嗯，好个呀，乃末今朝伲就大约摸张讲到该搭，最后阿有啥个想搭大家讲讲个？

孙悟空：想搭大家讲个就是，要多关注伲苏州闲话个音乐吧。

孙悟空：因为江浙沪吴语哀个一块啊，倷覅讲上海哉，无锡也做得比伲好，我也听着仔非常多优秀个作品，认得仔点优秀个音乐人，所说伲苏州还是需要大家来关注，来努力个。弗只是有评弹，就哀点吧。

予安：好个，乃末最后也借伲节目个机会，也发只小个广告，假使有欢喜唱歌个，能够做音乐作品个，弗管是男小干还是女小干侪可以搭伲联系一下，下趟伲好出合唱勒，对唱勒该种歌。

孙悟空：是个是个，要有对唱，百花齐放。

予安：好个，搿末就今朝到该搭，大家再会。

孙悟空：再会，谢谢。

总有人问我们，我想保护和传承方言，但是我可以做些什么呢？希望在这个栏目里你们的问题可以得到解答。

| 本栏目不定期更新，讲述我们身边的吴语故事 |

排版 | 予安

嘉宾 | Hiro孫悟空

图片来自网络

  往期导读  

沧浪一尘  |  娄清安