吴人云 | 海外游子心系吴语，汪天旸与多大吴语社
2019年到了，总觉得新的一年里应该有点新内容，想了又想，还是做成访谈形式吧，让大家听一听不同人口中的吴语故事！
吴人云 | 19年第05期 | 汪天旸
我们能为方言做些什么？
这个命题很大又很小，也许你说只能从自己做起多说多讲，也许有人说我要创作一本方言作品出版普及。
今天我们一起来看看，汪天旸和多伦多大学吴语社的故事。
予安：大家好，今朝伲吴人云请得来个是汪天旸同学，俚是加拿大多伦多大学现在个吴语社团个社长，倷自家来介绍介绍自家吧。
汪天旸：大家好，我叫汪天旸，我是滴滴呱呱个苏州人。我高中是苏高中毕业个，现在勒海多伦多大学读心理学政治学大三，今年我作为创始人创办仔伲多伦多大学头一个吴语社团——多大吴语文化协会。我个目的就是为仔保护吴语，传承吴文化。
多大吴语社招新实录
予安：蛮好蛮好。想问一声倷是从啥辰光开始关注到伲吴语该个话题个呐？
汪天旸：其实我关注切换吴语保护哀个话题也蛮早则，是从高中开始个。我自家觉着当中有几个转折点，对我来讲时穷重要个。
汪天旸：第一个转折点就是我观察到我身边个现象，我自家有两个表妹，平常辰光侪弗讲苏州闲话个。大个妹妹大概是03年出生个吧，俚是会讲但不过弗肯讲，小个妹妹是07年左右出生个，俚是会听弗会讲。对于我身边搿点苏州个同学，包括我自家来讲，平常辰光可以讲苏州闲话水平极其差。平常辰光刁嘴笃舌头，讲个苏州闲话末嗝勒嗝，哀个也是穷成问题个啦。
社长 汪天旸同学
汪天旸：第二点就是，我高中辰光就受屋里向伲爷娘个影响开除接触评弹，我自家觉着哀场优美个艺术如果因为苏州闲话个衰落消亡脱，我也是穷可惜个。
汪天旸：第三点，其实苏白学堂对我影响是蛮大个。我大约综高两个辰光吧，接触着仔苏白学堂，我觉着苏州闲话还可以哀场教，还可以哀场活泼，哀场生动。我觉着，搿个是我挨下来应该做个一桩事体。
汪天旸：至于为啥要创建伲个社团呢，其实是受一篇文章个启发，大家应该还记得今年19年春天个辰光吧，有一篇文章叫《为什么吴语衰落了》。搿篇文章是一个无锡个朋友写个，俚是从90后搿只角度来写吴语现在个现状，我自家觉着作为海外留学生蛮感动个，觉着有搿场个必要团结吴语区个留学生，大家一淘来保存吴语，传承吴文化，建立“吴语区共同体”个意识。同时也是以慰乡愁，勒外头，予安倷也懂个，要牵记屋里向个。
予安：搿末唔笃个社团到现在弄仔几化辰光哉？
汪天旸：伲个社团其实是五月份开始弄个啦，五月份就开始联络身边个吴语区个同学，江浙沪地区侪有，正式成立搿个社团。接下里暑假末，大家侪回到国内则啦，开始设计LOGO啊，申请伲学堂里个认证啊，包括建立伲个公众号啊，做点社团文创产品啊。近阶段主要是勒海准备开学个辰光，9月4号还有9月11号，会登勒多伦多大学办一个招新活动，还有就是拉赞助，巧妇难为无米之炊。因为伲是第一年，所以希望能够打一个开门红。
多大吴语社LOGO
予安：对个，该个蛮重要个。搿末现在阿有啥个，碰着过啥个问题，啥个困难啊搿种个呐？
汪天旸：问题、困难主要就是无不铜钿。因为无不资金支持啦，所以伲所有活动现在侪是自家出资。接下来伲会得勒海多伦多，譬方讲帮当地搿种中国人开个中餐馆啊或者苏帮菜啊本帮餐搿点参观合作，大家一淘，因为侪是勒海该样一只文化系统里向，能够拿伲吴语能打出来。
招新实录
予安：嗯，搿末接下来阿有啥个具体个计划呢？
汪天旸：接下来呢，伲个社团活动基本浪会得分为两部分。
汪天旸：一部分呢就是伲会得开一只吴语学堂个课，搿个是伲个工作重点。伲准备通过年纪轻，比较容易接受个方式，寓教于乐，普及吴语保护个意识。也会增加大家跟吴语接触个机会，同时为吴语区各个地方个朋友提供方言交流个机会。因为老早一脚觉着吴语区十里不同音，弗同地方个人弗好交流，伲现在就要打破该一只陈旧个观念。让大家觉着，诶，原来倷是上海个，我是苏州个，或者倷是浙江个，大家侪好听得懂。
社员合影
予安：嗯，该个蛮重要个，其实是可以个。
汪天旸：第二部分是关于吴文化，我是非常同意予安一只观点个，就是：语言俚是工具，俚是载体，俚是平台。关键呢侪是语言承载个文化是捺亨样子个，现在侪实梗内容为王嘛！伲海外留学生呢，勒海国外，其实对于吴文化个接触呢，远远叫弗够个。有种人呢是疏远吴文化，有种人呢是乡愁，牵记得弗得了。伲呢想通过一系列个文化活动，增加吴文化勒海大洋彼岸个存在感。有一句闲话讲得蛮好个，存在即是意义。
汪天旸：刚刚认得予安个辰光，我帮倷讲起过一个想法个，伲想勒海苏州全面推动苏州公共交通个吴语报站。苏州有地铁，有公交，勒海报站个辰光阿好用苏州闲话报站。现在苏州个情况是一部分个旅游线路是有吴语报站个，地铁是完全无不个。我因为跑过个地方比较多，譬方讲上海，俚个公交车完全就是沪语报站；广州帮香港粤语区呢，俚笃是粤语、国语、英语三语报站；台湾更加结棍，俚笃是国语、英语、闽南话、客家话四预报站。我觉得伲苏州作为吴语区经济文化个重镇，还是历史文化名城，应该负担起吴语区吴语保护个责任。
汪天旸：现在伲帮轨交公司沟通下来呢，觉得该桩事体推进的确有难度。弗过伲多大吴语也弗会放弃个，会得帮社会各界联合起来，继续来推动伲吴语报站勒海苏州，早点好落地，也希望大家拭目以待。
予安：嗯，该个假使做成功个说话，就是功德一件哉。也差弗多，接下来阿有啥个最后相对大家讲点啥个？
汪天旸：最后相对大家讲个末，其实刚刚也帮予安聊仔蛮好点辰光，我觉着，吴语保护现在只圈子穷大，伲慢慢叫大家开始建立一只生态系统。老早基础已经打得蛮好哉，挨下来就希望社会各界个朋友弗管是对吴语感兴趣也好，或者是本身就养了吴语区个也好，大家能够团结勒一淘，多为吴语保护做点事体。
予安：好，今朝就该场，大家再会。
汪天旸：谢谢大家！
总有人问我们，“我想保护和传承方言，但是不知道我可以做些什么？”希望在这个栏目里你们的问题可以得到解答。
| 本栏目不定期更新，讲述我们身边的吴语故事 |
排版 | 予安
嘉宾 | 汪天旸
图片来自多大吴语
往期导读